Әниләре эштә чакта, әтисе һәм улы янып үлгән, тагын ике бала уттан чыга алган

Башкортстанда янгында 34 яшьлек ир-ат һәм аның 12 яшьлек улы һәлак булган. Тикшерүчеләр җинаять эше ачкан. Бу турыда Тикшерү комитетына сылтама белән «Башинформ» хәбәр итте.

Ведомство белешмәсе буенча, 22 ноябрьгә каршы төндә Стәрлетамак шәһәрендә ике катлы шәхси йортта янгын чыга. Бу вакытта өйдә әти кеше, аның 14, 12 һәм 5 яшьлек балалары була. Әниләре төнге сменага эш киткән.

Янгынны сүндергәндә 34 яшьлек ир-ат һәм аның 12 яшьлек улының мәете табыла. Тагын бер малай белән кыз янгыннан чыгып котыла алган.

Башта 12 яшьлек малайны 14 яшьлек апасы уттан алып чыккан булган, тик малай кабат өйгә кереп киткән һәм кире чыкмаган. Кыз сүзләренчә, өйдә әтиләре һәм кире кереп киткән энесе калган.

Кызның кычкырган тавышларын күршеләр ишеткән. Күрше ир-ат йөгереп килгән. Кыз бала аңа өйдә нәни энесе калуын әйткән. Күрше шунда кереп, 5 яшьлек малайны алып чыккан, диелә хәбәрдә.

Чыганак: intertat.tatar