Баулылар бәрәңгедән яхшы уңыш көтә

Исергәп авылында яшәүче Айназ һәм Зөфәр Зариповлар бәрәңгене быел бишенче майда утыртканнар. Ата-анадан калган гадәт буенча алар икенче икмәкне һәр елны майның беренче атнасында ук чәчәләр.

– Бәрәңгене майның беренче көннәрендә үк чәчәбез. Чөнки ул вакытта җирдә дым күп була, – ди гаилә башлыгы Зөфәр Зарипов. – Бәрәңгенең дә төрле сортын чәчәргә тырышабыз, чөнки елның ничек киләсен белеп булмый. Бер елны бер төрлесе уңса, икенче елны икенче төрле бәрәңге уңа. Шуңа күрә иң ышанычлы юл – дүрт- биш төрле сортны чәчү.

Хуҗалар бәрәңгеләрен узган атнада ук казып караганнар. Быел бәрәңге уңышы өчен уңай ел, ди алар.

– Бәрәңге сортларының исемнәрен төгәл әйтә алмыйм, без аларны сары, кызыл, шәмәхә бәрәңге генә дип йөртәбез, – ди Айназ Зарипова. – Быел аларның барысы да яхшы уңыш бирер кебек. Һәр гаиләдәге кебек үк, без дә бәрәңгене яратабыз. Аннан төрле ризыклар әзерлибез.

Зариповлар сүзләренчә, бәрәңгене иртәрәк итеп чәчү барыбер отышлырак.