Баулы районында – Балалар китабы атналыгы

Мәктәп директорының тәрбия эшләре буенча урынбасары Гүзәл Җиһангәрәева “Баулы-информ” редакциясенә хәбәр иткәнчә, укучылар китапханәдә “Әкият патшалыгында маҗаралар” дип исемләнгән квест-уенда катнашканнар. Уенны китапханәче Зөлфия Җиһангирова алып барган. Балалар, командаларга берләшеп, төрле станцияләр буйлап сәяхәт иткәннәр.

- “Әкият чуалышы” станциясендә әкиятләрнең исемнәре буталган иде, балалар аларны дөрес төзергә тиеш булдылар, – дип сөйләде Гүзәл Җиһангәрәева. – “Табылдыклар бюросы” станциясендә алар төрле әкиятләрдән югалган әйберләрне таптылар”.

Балалар “Әкият лотосы” станциясендә табышмаклар чишкәннәр һәм рәсемне кирәкле номер астында урнаштырганнар. Ә “Геройны бел” станциясендә исә алар кроссворд чишкәннәр. Квест-уенның җиңүчесе булып “Зирәкләр” командасы танылган.
Чара мавыктыргыч һәм кызыклы узган. Балалар, үзләренең белемнәрен тикшереп карап, уңай эмоцияләр алып киткәннәр.

Фото: Кызылъяр мәктәбе архивы