Юлларда иминлекне арттыру өчен чаралар күрелә

Балаларның юлларда имгәнүләрен булдырмауга, автомобиль юлларын карап тотуга һәм ремонтлауга, шулай ук кыргый җәнлекләр катнашындагы юл-транспорт һәлакәтләре санын киметүгә зур игътибар бирелде. Утырыш йомгаклары буенча берничә мөһим карар кабул ителде:

• мәгариф бүлегенә җәйге каникуллар чорында массакүләм мәгълүмат чаралары һәм ата-аналар чатлары аша укучылар һәм өлкәннәр арасында аңлату эшләрен көчәйтергә кушылды;

• юл хезмәтләренә күпер кичүләрен тикшерергә, “Урал” М-5  федераль трассасындагы чокырларны тигезләргә, Измайлово-Поповка участогындагы юлны тиешле торышка китерергә, шулай ук Александровка-Ташлы автоюлын ремонтлауны планлаштырырга кирәк;

• федераль һәм региональ юллар хуҗалары җәнлекләр юлга еш чыга торган урыннарда “Кыргый җәнлекләр” юл билгеләрен урнаштыру мәсьәләсен карарга тиеш;

• “Бавлы-информ” редакциясенә иминлек мәсьәләләрен яктыртырга, шул исәптән федераль трассаның җир өсте кичүе янында юл аша кагыйдә бозып үтүче җәяүлеләр турында махсус материал әзерләргә тәкъдим ителде.

Баулы районында юл хәрәкәте иминлеген тәэмин итү комиссиясе рәисе, Баулы районы башкарма комитеты җитәкчесе Данияр Бакиров үз чыгышында кешеләрдән килгән мөрәҗәгатьләрне анализлады. Алар, нигездә, юлларның авария куркынычы югары булган участокларына һәм юл инфраструктурасындагы җитешсезлекләргә кагыла иде. Анализ нәтиҗәләре буенча, Баулы шәһәре башкарма комитетына Октябрь һәм Зелёная урамнарында сферик көзгеләр урнаштырырга, шулай ук “Семья” балалар һәм үсмерләр өчен социаль приюты янында тизлекне чикләү мәсьәләсен карарга йөкләнде.

Комиссия рәисе “Халык инспекторы” (“Народный инспектор”) дәүләт мәгълүмат системасы эшенә аерым тукталып узды. Ул искәртеп үткәнчә, әлеге мобиль кушымта, юл хәрәкәте һәм территорияне төзекләндерү кагыйдәләрен бозу очракларын видеога төшереп, материалларны турыдан-туры дәүләт автоинспекциясенә юлларга мөмкинлек бирә. 2024 елның сентябреннән башлап, кагыйдә бозуның җиде категориясе (кызыл утка чыгу, каршы полосага чыгу, җәяүлегә юл бирмәү һәм башкалар) буенча хәбәр иткән өчен, расланган штраф суммасының 25 проценты күләмендә акчалата бүләк каралган.

Данияр Бакиров әлеге кушымтаны көндәлек тормышка активрак кертергә һәм бу хакта район халкына җиткерергә чакырды. Бу һәркемгә юлларда куркынычсызлыкны арттыруга үз өлешен кертү мөмкинлеге бирәчәк.

Барлык йөкләмәләр контрольгә алынды һәм билгеләнгән вакытта үтәлергә тиеш. Юл хәрәкәтенең һәр катнашучысы – машина йөртүче, җәяүле яки пассажир – үзен имин хис итсен өчен, комиссия эше дәвам итә.

Фото: Мария Кандаурова