Баулылы һава чисталыгын кайгырта

Югары бәяләнү артында республиканың төрле медицина оешмаларында узган зур тырышлык һәм 46 еллык хезмәт стажы тора.

Миңнегөл Идрисова Татарстанның ул вакытта Ютазы районы Димтамак авылында туган. Әңгәмәдәшебез сөйләгәнчә, ул балачактан ук хәрәкәтчән уеннарны гына түгел, ә кайда нәрсәдер үлчәргә, чагыштырырга һәм санарга да яраткан. Ә мәктәптә укыган елларда ул химия дәресләрен үз иткән. Миннегөл Мөгыйн кызы әлеге фән буенча укытучысы Айсылу Гайнаншинаны җылы сүзләр белән искә ала, ул вакытта күп кенә укучыларның химия белән мавыгуларын, яхшы белем башлангычы алуларын, фәнне мәктәпне тәмамлаганнан соң да яхшы хәтерләүләрен әйтеп үтте.

Миннегөл Идрисова мәктәптән соң «фельдшер-лаборант» белгечлеге буенча Казан медицина училищесында укый. Уку йортын тәмамлагач, кызны юллама буенча Актаныш район үзәк хастаханәсенә фельдшер-лаборант итеп билгелиләр. Өч елдан соң аны Актаныш санитария-эпидемиология хезмәтләренең дезинфекция бүлеге мөдире дәрәҗәсенә күтәрәләр. 1986 елда Миннегөл Идрисова өйгә әти-әнисенә якынрак булу өчен туган районына фельдшер-лаборант булып күчә. 30 ел буена Баулы Дәүләт санитария- эпидемиология күзәтчелегендә хезмәт куя. Ул намус белән Бөгелмә, Азнакай һәм Баулы районнарына фельдшер-лаборант хезмәте күрсәтә.

2017 елның ноябреннән «Татарстан Республикасында (Татарстан) гигиена һәм эпидемиология үзәге» ФБУЗ филиалының Лениногорск районы бүлегенең санитар-химия лабораториясенә күчерелә. Хезмәт күрсәтү географиясенә тагын өч – Әлмәт, Зәй, Лениногорск районнары өстәлә.

Миннегөл Мөгыйн кызы рөхсәт ителгән максималь һәм уртача концентрацияләрнең үтәлешен контрольдә тоту өчен эш зонасының һава пробаларын ала. Атмосферадагы һава пычраткыч матдәләрнең күләмен һәм торышын билгеләү өчен, бер тапкыр һәм тәүлеклек уртача пробаларны сайлап ала.

Белгечкә эш буенча күп йөрергә туры килә. Ул Баулы районы, Баулы шәһәре, Бөгелмә районы, Бөгелмә шәһәре, Азнакай районы, Азнакай шәһәре, Ютазы районы, Куйбышев тимер юлы һәм тимер юл инфраструктурасы шулай ук транспорт объектларында була. Миңнегөл Мөгыйн кызы һавада зарарлы матдәләрне билгеләүнең 28 методикасына ия. Анализ өчен һава ябык биналарда, эш зоналарында (җитештерү цехлары, нефть станцияләре, сәнәгать-җитештерү объектлары) алына, шулай ук Баулы, Бөгелмә һәм Урыссуда социаль-гигиена мониторингы (СГМ) нокталарында атмосфера һавасын сынауга ала. Һава составында нинди ингредиентлар булуга карап, Миннегөл Идрисова сайлап алынган пробаларны тапшырырга Лениногорскка барырга мөмкин, әгәр киңәйтелгән тикшеренүләр кирәк булса, Әлмәт лабораториясенә бара, анда һаваны анализлау өчен кирәкле җиһазларның һәм приборларның киңрәк җыелмасы бар.

Нәтиҗәле хезмәте өчен баулылы берничә тапкыр мактау грамоталары һәм рәхмәт хатлары белән бүләкләнгән. Алар арасында: Татарстан Республикасы Дәүләт санитария-эпидемиология күзәтчелеге үзәгенең мактау грамотасы, Казан шәһәре, Баулы районы һәм Баулы шәһәре администрациясе башлыгының мактау грамотасы, Россия Федерациясе сәламәтлек саклау һәм социаль үсеш министрлыгының мактау грамотасы, «Татарстан Республикасының атказанган сәламәтлек саклау хезмәткәре» медале бар.

Эшеннән соң, Миннегөл Мөгыйн кызы бакчасына ашыга, анда яшелчә, җиләк-җимеш үстерә. Аның сүзләренчә, бакча – аның ял итү һәм тынычлык ала торган урыны. Үсемлекләр чәчәк аткан сезонда хуҗабикәне генә сөендермиләр. Ул үзенең туганнарын, якыннарын һәм хезмәттәшләрен үзе әзерләгән чәчәк бәйләмнәре белән сөендерә. Ул бизәгән чәчәкләр бик күп бәйрәмнәрне бизи, пешергән пироглары табынны бизи. Миннегөл Идрисова үзе пешергән пирог белән «Хезмәткә дан» редакциясе хезмәткәрләрен дә сыйлады. Ул күчтәнәч итеп кәбестәдән зур пирог пешереп китерде.