Баулы районы мәктәбендә – рәсемнәр күргәзмәсе

Дөньяны экологик һәлакәттән саклап калу мәсьәләсе күптән барлыкка килгән. Бу эшнең актуальлеге туган якның табигате өчен җаваплылык хисләрен формалаштыру һәм аны яхшы якка үзгәртү теләге белән бәйле. Бу максат белән, Кызылъяр мәктәбенең “ЭкоКүбәләкләр” экология берләшмәсе укучылары "Экология – балалар күзлегеннән" дигән темага рәсемнәр күргәзмәсе оештырган. Алар бу чараны “ЭКВЕСТ” республика конкурсы биремнәрен үтәү кысаларында үткәргәннәр.

Исегезгә төшерәбез: конкурсны, Татарстан республикасы экология һәм табигый байлыклар министрлыгы белән берлектә, “Чиста булачак” төбәк яшьләр иҗтимагый оешмасы үткәрә. Аның кысаларында, экология берләшмәләренә табигатьне саклау чаралары уздыру буенча биремнәр бирелә. Моңа кадәр Кызылъяр мәктәбенең “ЭкоКүбәләкләр”е үзләренең командалары турында видеоролик әзерләгәннәр, мәктәп укучылары өчен экология дәресе, Ык елгасы ярларын чистарту өмәсе үткәргәннәр, әйберләрне икенчел куллануны популярлаштыру чарасы уздырганнар иде. Шулай ук алар, “Калдыкларны аерым җыю практикумы” биреме кысаларында, мәктәптә икенчел чимал җыю акциясе, Бөтендөнья экологик белемнәр көне уңаеннан да төрле чаралар үткәргәннәр.

Фото: Кызылъяр мәктәбе архивы