Баулы аграр көллиятендә профилактиканың яңа форматы булдырылды

Очрашу формаль булмаган шартларда узды, студентлар үзләрен кызыксындырган сораулар бирә алды, фикерләрен әйттеләр һәм законга нигезләнгән дәлилле җаваплар да алдылар. Төрле сораулар каралды, шул исәптән студентлар тормышында килеп чыгарга мөмкин булганнары да. Мошенниклык, законсыз бизнес, социаль челтәрләрдә мыскыллау, алкоголь куллану һәм башка шундый темалар турында сөйләделәр.

“Ирләр сөйләшүе” проектының төп идеясе – ышанычлы мәйданчык булдыру. Анда яшьләр үзләрен борчыган темаларга ачыктан-ачык сөйләшә һәм компетентлы аңлатмалар алсын өчен оештырылды. Бу формат монолог түгел, ә диалог. Һәр тема хокук һәм бурычлардан алып, реаль тормыш ситуацияләренә кадәр, законга таянып тикшерелде. Нәтиҗәдә студентлар теге яки бу ситуациядә ничек эш итәргә, закон белән нинди хокуклар якланган һәм гражданнарга нинди бурычлар йөкләнүе турында ачык аңлатмалар алдылар. Мондый алым ярдәмендә яшь буын хокукый киртә кысаларын яхшырак аңлый һәм нигезләнгән карарлар кабул итәргә өйрәнә.

Очрашуда катнашучылар яшьләр арасында профилактика һәм хокукый грамоталылыкның мөһимлегенә басым ясадылар. Район башлыгы Ильяс Гозәеров билгеләп үткәнчә, вакытында дөрес карар кабул итә белү һәм үз-үзеңне тоту киләчәк карьерада гына түгел, гомумән, көндәлек тормышта да ярдәм итә. Шәһәр прокуроры Сәйяр Зыятдинов һәм эчке эшләр министрлыгының Баулы районы буенча бүлеге начальнигы Марат Кадыйров студентларның сорауларына җавап бирделәр, конкрет мисаллар китерделәр һәм кирәк булганда, гамәлдәге хокукларга таянып, законнарның нигезләмәләрен аңлаттылар. Мондый аралашу форматы студентларга актуаль мәгълүмат алырга мөмкинлек бирде. Әлеге сөйләшү аларга киләчәк тормышта да кирәк булыр.

Агрокөллият директоры Гүзәл Гыйләҗева билгеләп үткәнчә, бүген профилактика – сүз генә түгел, сыйфатлы яңа хезмәттәшлек таләп итә. Ул проектны башлап җибәргәнче, агрокөллияттә анкета үткәрелгән: җинаять һәм административ җаваплылык белән бәйле проблемалы зоналар ачыкланган, шулай ук укучыларның психологик үзенчәлекләре исәпкә алынган.

– Балалар белән гади сөйләшүнең мәгънәсе юк, ниндидер яңа, заманча юнәлеш кирәк, – ди Гүзәл Гыйләҗева. – “Ирләр сөйләшүе” проекты сыйфат ягыннан яңа алым, ышанычлы атмосфера тудыру, безнең студентлар белән хакимият һәм хокук тәртибенең абруйлы вәкилләре арасында диалог булдыруны тәкъдим итә, анда актуаль мәсьәләләр карала, безнең студентларга кагылышлы проблемалар күтәрелә, үз-үзеңне тотуның конструктив модельләре тәкъдим ителә. Һәм, әлбәттә, егетләр күп кенә җавапларны нәкъ менә хакимият һәм хокук саклаучылар вәкилләреннән ишетергә тиеш.  Төрле хәлләрдә калу очрагында алар дөрес җавап бирә һәм дөрес карарлар кабул итә алачак.

“Ирләр сөйләшүе” проекты белән параллель рәвештә агрокөллияттә “Кызлар арасында гына” дип исемләнгән тагын бер инициатива планлаштырыла. Анда хатын-кызлар табибларын җәлеп итеп, сәламәтлек һәм профилактика мәсьәләләре турында фикер алышу булачак.

Фото: Айгөл Габдрәфыйкова