Ярдәм итик

Һәркемгә үз баласы күз карасыдай кадерле. Аларның сәламәт булуы, бәхетле карашлары – ата-ана өчен зур байлык. Бүгенге көндә Эльмирның бераз гына уйнап, йөгергәләп килсә дә, тын алуы авырлаша. Үткәрелгән тикшерүләр нигезендә Казанның балалар клиникасының кардиохирургия бүлеге мөдире тәкъдиме буенча бердәнбер ысул – ул Эльмирның йөрәгенә Американың Бостон балалар клиникасында операция ясау. Клиника табибларының әлеге диагнозлы балаларга операция ясау буенча тәҗрибәсе зур. Тик бу катлаулы операцияне уздыру өчен 20 миллион сумга якын акча кирәк булачак. Гаилә инде берничә ай төрле ысуллар белән акча җыя. Халык кем ничек булдыра ала, кем күпме акча сала ала - барысын да эшли. Кемнәрдер 100-200 сум салса, кемнәрдер зур сумма да сала. Ярдәм кулын “Благодарение” фонды сузган, операция өчен барлыгы 5 миллион 800 мең сум акча күчергән. Шулай ук “Ак Барс созидание” хәйрия фонды да читтә калмый, үз өлешен кертә. Күпләп акча күчергән баулылылар да юк түгел. Ярдәмгә мохтаҗ гаиләгә бүгенге көндә 6 миллион сум акча җыясы калган. Ә вакыт дигәнең бер урында тормый, сәгатьләр һәм минутлар ашыга. Операция көненә дә өч атна гына калып килә. Кечкенә Эльмирга ярдәм итү өчен “Шанс” сүзен язып, шунда ук җибәрәчәк сумманы да кертеп, 7715 номерына смс җибәрергә була. Шулай ук акча күчерү өчен башка ысуллар да бар. Бала йөрәге тибәргә һәм яшәргә тиеш. Әйдәгез, якташыбызга кулдан килгәнчә ярдәм итик.

Айгөл Хөсәенова

Автор фотосурәте