Дәүләт программасы аша торак алу

– “Баулы муниципаль районында яшь гаиләләрне торак белән тәэмин итү” программасы – анда торак шартларын яхшыртуга мохтаҗ, гариза биргән һәм субсидия алган вакытта яше 35 яшьтән артмаган һәм түләүгә сәләтле яшь гаиләләр катнаша ала. Торакка субсидия түләүсез бирелә. Ул баласыз гаиләләргә торакның хисап бәясеннән 30 процент күләмендә түләнә (ике кешелек гаилә өчен – 42 кв.метрга, ә өч һәм аннан да күбрәк кешелек гаилә өчен – һәр кешегә 18 кв. метрга); балалы гаиләләр өчен – торакның хисап бәясеннән 35 процент күләмендә (ике кешелек гаилә өчен – 42 кв. метрга, ә өч һәм аннан да күбрәк кешелек гаилә өчен – һәр әгъзага 18 кв. метрга). Шулай ук ул яңа, икенчел торакка, йорт төзелешенә яисә мохтаҗлык буенча хисапка куелганнан соң алынган ипотеканы түләп бетерүгә бирелә. Әлеге программа буенча Баулы районында субсидия алуга 23 гаилә чират тора. Гаиләләр бу программадан ел саен файдалана. Узган ел күп балалы бер яшь гаиләгә торак алу өчен сертификат тапшырылды. Быел сертификат бер күп балалы гаиләгә торак сатып алу өчен тапшырылды, – дигән мәгълүмат бирде Валентина Вотчинникова.

– Икенче программа – федераль – “Авыл территорияләрен комплекслы үстерү”. Әлеге программа кысаларында авыл җирендә яшәүче һәм эшләүче гражданнарга торак шартларын яхшырту өчен субсидияләр (торакның исәпләнгән хакының 70 процентка кадәр күләмендә түләүсез субсидия) бирү каралган. Субсидия торак йорт төзүгә яисә торак урын сатып алуга бирелә. Программада торак шартларын яхшыртуга мохтаҗ дип танылган, авыл җирендә кимендә бер ел яшәүче һәм агросәнәгать комплексында кимендә бер ел эшләүче, Россия Федерациясе гражданнары булганнар яисә гаиләләр, шулай ук үз яисә заем акчалары исәбеннән торак төзүнең (сатып алуның) исәп-хисап хакының кимендә 30 процентын кертә алучылар катнаша ала.

Татарстанда һәм районда “социаль ипотека” программасы эшли. Аннан бюджет өлкәсе хезмәткәрләре, 35 яшькә кадәрге яшь гаиләләр, ә 2025 елдан – махсус хәрби операциядә катнашучылар һәм аларның гаилә әгъзалары файдалана ала. Торак бәясен түләп бетерү срогы 11 елдан 28 елга кадәр тәшкил итә. Моннан тыш, социаль ипотека шартнамәсе гамәлдә булган чорда туган һәр бала өчен дәүләт фатир бәясеннән 200 мең сум акча күчерә. Районда социаль ипотека программасы буенча торак алырга теләүче унбер гаилә исәптә тора. Хәзерге вакытта Баулының Төзүчеләр урамында ТР рәисе каршындагы Дәүләт торак фонды ярдәмендә “ятим балалар” категориясе буенча ике сигез фатирлы торак йорт төзелә.

Татарстан республикасы министрлар кабинетының “Торак шартларын яхшыртуга мохтаҗ күпбалалы гаиләләрне торак белән тәэмин итү буенча өстәмә чаралар турында” 2007 елның 18 декабрендәге 732 номерлы карарын гамәлгә ашыру кысаларында биш һәм аннан күбрәк бала тәрбияләүче 15 күпбалалы гаилә торакка мохтаҗ дип танылды һәм исәптә тора. 2026 елда бер күп балалы гаилә торакка сертификат алды. “Федераль законнарда билгеләнгән гражданнар категорияләрен торак белән тәэмин итү буенча дәүләт йөкләмәләрен үтәү” төп чарасы кысаларында бер граждан “Ерак төньяк районнарыннан һәм аларга тиңләштерелгән җирлекләрдән киткән гражданнар” категориясе буенча торак шартларын яхшырту кысаларында торак сатып алуга сертификат алу өчен исәпкә баскан.

– Дәүләт программаларын гамәлгә ашырганда коррупцияне кисәтү өчен мөрәҗәгать итүчеләр документларны Баулы районында федераль һәм республика торак программаларын (ярдәмче программаларны) гамәлгә ашыруны тәэмин итү өчен расланган исемлек буенча бердәм торак комиссиясенә карау өчен тапшыралар. Гамәлдәге барлык программалар, аларда катнашу шартлары турында мәгълүмат, шулай ук кирәкле документлар исемлеге Баулы муниципаль районы сайтында урнаштырылган. Документларны тапшырырга уйласагыз, район сайтыннан башларга киңәш итәм, чөнки анда гаризаларның актуаль формалары һәм аларга аңлатмалар урнаштырыла – бу әзерләүне бик җиңеләйтәчәк, – ди спикер.