Чаллы Җәмигъ мәчетенең төп гөмбәзенә ярымай куелды

Бүген Чаллыдагы Җәмигъ мәчетенә ярымай куелды.Тантанага йөзләгән дин тотучы җыелды, ә җитәкчелек әлеге чараны «тарихи» дип атады. Видеолар автошәһәр мэриясенең Телеграм-каналында чыкты.

Шулай ук шәһәрнең зур оешмалары һәм предприятиеләре җитәкчеләре, мөселман активы вәкилләре, Чаллы башкарма комитеты җитәкчесе Фәрит Сәлахов һәм имам-мөхтәсиб Әлфас Гайфуллин да катнашты.

Мөхтәсиб Әлфас Гайфуллин шәһәр мэры Наил Мәһдиевка һәм иганәчеләргә ярдәм өчен рәхмәт белдерде.

«Бүген шәһәрдә зур бәйрәм. Мэрга һәм аның командасына, иганәчеләргә рәхмәт. Алар ярдәме белән без инде җиденче ярымайны куябыз», - диде ул.

Җәмигъ мәчете Чаллыда 1993 елдан бирле төзелә. Анда берьюлы 3,2 мең кеше сыя, ә аның каршындагы мәйданда бәйрәмнәр вакытында 20 меңгә кадәр дин тотучы урнаша ала.

Чаллы мэриясе фотолары