Баулыда үрнәкле гаилә

Җылы сүзләр һәм теләкләр
Гөлчәчәк һәм Николай Коротаевларның үзара аңлашу һәм хөрмәт тулы гаилә тарихы якыннарын гына түгел, ә аларны белүче бар кешене илһамландыра. Алар, 50 ел бергә иңне-иңгә куеп гомер итеп, күпне күргән, күпне кичергән: бергәләп авырлыкларны җиңеп чыкканнар, уңышларына сөенгәннәр, тормыш мизгелләре белән уртаклашканнар.
Баулы районы ЗАГСында узган тантаналы чара Коротаевларның туганнарын, дусларын һәм хезмәттәшләрен әлеге мөһим юбилейны билгеләп үтү һәм аларга җәмгыятькә, мәгарифкә, мәдәнияткә керткән өлешләре өчен рәхмәт белдерү өчен җыйды. Аларның мәхәббәт тарихы, шахмат белән мавыгулары һәм гаиләгә тугры булулары яңа буынны тәрбияләү өчен мөһим нигез булды. Бик күпләр аларның зирәклегеннән һәм тәҗрибәсеннән илһам ала.
Бәхет хроникасы

Николай Николаевич белән Гөлчәчәк Гыймалетдиновна икесе дә бер елгы – 1954 елда Баулыда туганнар. Николай Николаевич, урта мәктәпне тәмамлап, Совет Армиясенә алына. Хезмәт итеп кайткач, Баулы технологик транспорт идарәсендә эшли башлый. 1984 елдан башлап, Азинмашта агрегат машинисты эшен педагогик эшчәнлек белән бергә алып бара, балаларны шахмат уйнарга өйрәтә. Ә бу исә аңа үзенең белем һәм тәҗрибәсен үсеп килүче буынга тапшырырга, аларның логик фикерләвен һәм стратегик сәләтләрен үстерергә мөмкинлек бирә. Николай Николаевич зур казанышлары һәм эшкә тугрылыгы өчен, хезмәт этикасының якты үрнәге булып, Баулы, Азнакай, Актаныш районнары башлыкларының мактау грамоталары, күпсанлы бүләкләр, шул исәптән 3 дәрәҗә Дан ордены, 100 еллык медале һәм Татарстан АССР төзелүгә 100 ел тулу билгесе, физкультура һәм спорттагы билгесе белән бүләкләнә. Николай Николаевич 2009 елда Татарстан Республикасы Шахмат федерациясенең вице-президенты итеп сайлана.
Гөлчәчәк Гыймалетдиновна 9нчы сыйныфтан соң Минзәлә педагогия училищесында белем ала. Хезмәт биографиясен ул мәктәпкәчә учреждениедә педагог буларак башлап җибәрә. Ул күп еллар дәвамында кайгыртучан хуҗабикә һәм балалар бакчасында тырыш тәрбияче ролен бергә алып бара. Гаиләдә җылы һәм дустанә мохит тудырып, лаеклы ялга чыкканчы үз һөнәренә тугры кала. Гөлчәчәк Гыймалетдиновна РФ мәгариф һәм фән министрлыгының, Баулы районы башлыгының мактау грамоталары белән бүләкләнә. Тормыш иптәшенең шахмат белән мавыгуыннан илһамланып, ул да бу уенны үзләштерә башлый һәм, яңа мавыгуына сабыйларны да җәлеп итәргә теләп, бик шатланып тренер ролен үз өстенә ала. Ул, төп эшеннән тыш, мәктәпкәчә яшьтәге балалар өчен шахмат түгәрәген дә алып бара.
Юбилярларның мәхәббәт тарихы, гади генә тоелса да, үзгә бер җылылык һәм аңлашу белән тулы. Алар Николай армиядә хезмәт иткәндә уртак дуслары аша танышалар һәм хат языша башлыйлар. Егет армиядән кайткач, яшьләр өйләнешә. Коротаевларның 50 еллык гаилә тормышы – бәхет хроникасына гына түгел, киләчәк буыннар өчен дә кыйммәтле мирас та. Аларның шахмат белән мавыгулары бик мөһим уртак шөгыльгә әверелә һәм алар аны, бик сөенеп, инде күпме еллар районыбыз балаларына тапшырып киләләр. Коротаевларның бердәмлеге һәм зирәклеге символына әверелгән бу уен яшьләрне интеллектуаль казанышларга рухландыра һәм аларда сабырлык, стратегия һәм көндәшкә хөрмәт кыйммәтләрен формалаштыра.
Николай Николаевич белән Гөлчәчәк Гыймалетдиновна ике балага гомер биргәннәр, ә алар исә әти-әниләрен оныклар белән сөендергәннәр. Баланың баласы балдан татлы дип юкка гына әйтмиләр: дүрт оныкның һәрберсе кадерле, аларның һәр елмаюы бетмәс-төкәнмәс сөенеч бирә. Әби һәм бабай булу Николай Николаевич белән Гөлчәчәк Гыймалетдиновна өчен илһам һәм бәхет чыганагына әверелгән, балачакның тылсымлы мизгелләрен кабат кичерергә һәм тормышларын яңа җылы истәлекләр белән баетырга мөмкинлек биргән.
Юбилярлар, тәҗрибә һәм белем туплап, лаеклы хезмәт юлын намус белән үткәннәр. Хаклы ялга чыккач та, спорт мәктәбендә шахмат түгәрәкләре алып барып, балаларны интеллектуаль казанышларга илһамландырып, үсеп килүче буында шахматка мәхәббәт уяталар. Коротаевлар икесе дә хезмәт ветераны дигән мактаулы исемгә ия.

             Үпкә сакламау мөһим        
Чара дәвамында кунакларны җирле артистларның музыкаль бүләкләре сөендерде. Николай белән Гөлчәчәк Коротаевлар, тантаналы шартларда, мактаулы юбилярлар китабына имзаларын куйдылар. Чараның кульминациясе юбилярлар биюе – алтын туй вальсы булды, алар аны җанлы музыка астында башкардылар. Бу дулкынландыргыч мизгел аларның бер-берсенә мәхәббәт һәм хөрмәт символы булды.
Ә гаилә бәхетенең сере гади булып чыкты. Ул, нигездә, авырлыкларны җиңеп чыга белүдән һәм бер-береңне аңлауга юл табудан гыйбарәт. Николай Коротаев, “Хезмәткә дан” хәбәрчесе белән аралашканда, ныклы мөнәсәбәтләрнең мөһим аспектын ачты – гаиләдә низагларны уңышлы хәл итү.  Никадәр генә ныклы гаилә булмасын, каршылыклар чыкмый тормый. Әмма нәкъ менә бу низагларны хәл итү юлын таба белү ир белән хатын арасындагы бәйләнешнең никадәр көчле булачагын билгели.
–  Ачуланышкан чагында, чыгу юлын табарга һәм моны лаеклы хәл итәргә кирәк, Ягъни гаиләдә фикер каршылыгы булмый дигән сүз түгел, ә аны тирәнгә җибәрми генә хәл итәргә кирәк, моны икең дә аңлау мөһим, – ди Николай Николаевич. – Әйтик, сез ачуланыштыгыз ди, шул чагында учакка ут өстәргә кирәкми. Бераз дәшми торыгыз, суыныгыз, артыгын әйтеп ташламагыз.  Күпмедер вакыттан соң, һичшиксез, дуслашырга, барысын да уртага салып сөйләшергә кирәк – безнең гаиләдә, гадәттә, беренче булып мин эндәшә башлый идем. Шуның белән ачуланышуга нокта куела – каршылыкларга китергән бөтен нәрсәне онытабыз. Һәм без шуны аңлыйбыз: сынауны лаеклы узгач, эшне тирәнгә җибәрмәгәч, сөйләшкәч, күңелгә рәхәт булып китә.
Гаилә башлыгы билгеләп үткәнчә, дуслашу – гармонияне торгызуга адым гына түгел, ә бер-береңә якынаю мөмкинлеге дә. Гафу итә белү һәм үпкәләрне артта калдыру, ничә ел бергә яшәүгә карамастан, мөнәсәбәтләрне яңа хисләр белән баета һәм мәхәббәтне ныгыта.