Баулы мәчетләрендә балалар ял итә һәм дин нигезләрен үзләштерә

Баулы районы имам-мөхтәсибе Әнвәр хәзрәт Хәмитов сөйләвенчә, балалар өчен чаралар бүгенге көндә районыбызның биш мәчетендә башланган: Баулыдагы “Өмет”, “Гали”, Татар Томбарлы, Кызылъяр, Мортаза авыллары мәчетләрендә. Баулыдагы ике мәчеткә иллеләп бала йөри. Иртәнге сәгать тугыздан көндезге икегә кадәр балалар ислам дине нигезләрен өйрәнәләр, саф һавада хәрәкәтчән уеннарда, викториналарда, конкурсларда катнашалар. Алар өчен табигать кочагына сәяхәтләр, мәдәни программалар да оештырыла. Балаларны көн саен тәмле төшке аш белән дә тәэмин итәләр.