Болай ук булыр дип уйламаганнар

Утырышны ТР хөкүмәтенең 1нче вице-премьеры Равил Моратов алып барды. Гадәттән тыш хәлләр министрлыгы мәгълүматлары буенча, Татарстанда ул вакытка республиканың 11 торак пунктында йортларны су басу очраклары күзәтелгән. Республиканың Лениногорск, Баулы, Алабуга, Әлки, шулай ук Тукай һәм Яңа Чишмә районнарында хәл киеренке булды. ТР МЧС министры Баулы районының Шалты, Кандыз, Татар Томбарлы, Кызылъяр, Уба, Бакалы авылларын су басуын әйтеп узды. Баулы районында барлыгы 218 торак йортны су баскан, 53 кеше, шул исәптән 23 бала эвакуацияләнгән. Ведомстволар эшен янгын сакчылыгы җирле гарнизоннарының оператив төркемнәре координацияли; урында авыр техника (экскаваторлар, бульдозерлар) эшли, шулай ук инерцияле материаллар (ком) төягән йөк машиналары җәлеп ителгән.
- Ситуация без көткәнчә булмады, - диде ТР МЧС министры. - Татарстанның көнчыгышында һава температурасы климат нормаларыннан 10 градуска югарырак булды. Кинәт җылыту һәм яңгырлар нәтиҗәсендә кечкенә елгалар ярларыннан ташып чыкты.Видеоконференцэлемтә аша Равил Моратов проблемалы район җитәкчеләре белән бәйләнешкә керде, шул исәптән Баулы муниципаль районы башлыгы Альберт Хәбибуллин белән дә. Барысы да диярлек хәбәр иттеләр: хәл тотрыклы, суның биеклеге кимегән, кризис чоры үтелде, ут һәм газ бар, мал-туар коткарылды.
- Тынычланырга иртәрәк, - дип ассызыклады Моратов.
Утырышта шулай ук язын һәм җәен урман янгыннарын булдырмау мәсьәләсе дә каралды.