Сайлау участоклары әзер

Баулы районында сайлауларга 38 сайлау участогы әзерләнгән һәм җиһазланган: 16сы – Баулы шәһәрендә, 22се – авылларда. Бу хакта Баулы районы территориаль сайлау комиссиясе рәисе Рима Солтанова хәбәр итте.

Районыбызда барлыгы 22849 кеше сайлауда катнашу хокукына ия: Баулыда –13336, авылларда – 9513 кеше.

 Рима Солтанова сөйләгәнчә, сәламәтлек торышы сәбәпле сайлау участогына бара алмаган кешеләр, шулай ук өлкәннәр, коронавирус инфекциясе йоктыру куркынычы янамасын өчен, өйләрендә тавыш бирә ала. Халыкның инде 20 проценттан артыграгы өйләрендә сайлау теләген белдергән. Территориаль сайлау комиссиясе өйдә тавыш бирү өчен гаризаларны әле кабул итә.

Территориаль сайлау комиссиясе рәисе сайлаулардагы бюллетеньнәр турында да мәгълмат бирде: һәр сайлаучыга икешәр бюллетень бирелә. Бер бюллетень – Баулы районы керә торган  Әлмәт бер мандатлы округы буенча (анда тугыз кандидат була). Икенче бюллетень – сәяси партияләрне (14 партия) сайлау буенча.